香港五大海域潛水

「香港潛水……有嘢睇咩？」相信好多Divers或者未有牌嘅潛水員，都有呢個疑問。要解答謎題，我哋DEVE正是要公開香港的海底秘密！睇完你將會發現，原來香港嘅海洋資源好豐富，無論係南區的潛點、還是西貢的海岸公園都隱藏好多瑰寶，好值得大家去珍惜、愛護。

文︰DK

鳴謝︰Raymond Man、Jeffery Chung

西貢高清水質：海下灣

海下灣唔止係香港受保護嘅海岸公園，而且仲係早於1996年，全香港第二個被政府納入海岸公園保護範圍嘅項目，位於香港西貢半島嘅北面。好多人知道佢係浮潛勝地，但就唔知有關佢嘅珊瑚覆蓋率，亦係全港最高。而在八十幾種珊瑚之中，約有六十種可於此處尋獲，所以話，喺呢度潛水一定唔會失望，當中磨洲北是觀賞珊瑚的好地方，至於棺材角水深可達十五米，呢啲地方適合潛水多過浮潛，總之海下的高清水，會令潛水員喜出望外。

– 海下水質清徹，海底七彩繽紛。

– 據知海下灣的珊瑚覆蓋率係全港最高㗎。

– 潛水員游近珊瑚，比浮潛睇得更清楚。

– 呢個海域都有好多海洋生物，例如大水母。

– 有冇喺水底見過海葵翩翩起舞的樣子？

南區海扇秘景︰黃麻角

好多人覺得南區嘅海底有如荒漠，呢個諗法太錯啦！近在赤柱的聖士堤反灣對開海域的黃麻角，水底約十至十三米深處，有大量好正嘅海扇（又稱扇珊瑚），環境媲美外國的扇珊瑚潛點，另外亦有唔少軟珊瑚分佈呢度。不過呢個潛點實在有少少鬼馬，由於附近海域水流都幾急，要下潛去呢個位置一定要清楚當日嘅水流狀態，另外能見度亦是此潛點另一問題，建議潛水員要跟經驗十足嘅教練同行，去發掘呢啲咁有特色嘅潛水寶庫。

– 黃麻角最cool嘅地方就係呢種海扇。

– 潛到十幾米時眼前一亮，好似去咗另一個世界。

– 雖然附近水流有時都幾急，但能夠見到咁靚嘅珊瑚係值得㗎。

– 一條獅子魚出現在珊瑚區。

– 扇珊瑚使人感覺好震撼。

探索最東北海域︰東平洲

東平洲，如果用十八區嚟劃分，其實係屬於大埔區！同大鵬灣非常鄰近，而佢唔單止係屬於海岸公園，島上嘅沉積岩亦是重要的地質景點。講到潛水，則擁有面積最大嘅珊瑚群落，同時亦有豐富嘅海藻床，三十幾種硬體及軟體珊瑚、百幾種嘅魚類等，潛點例如在亞媽灣對開水域就已有不同的珊瑚區，好適合鍾意睇魚，甚至係鍾意玩水底攝影嘅潛友。

– 海底充滿着好多懂得「扮嘢」嘅魚。

– 東平洲有百幾種魚類生活，細心睇一定有發現。

– 呢度亦是水底攝影發燒友形容嘅天堂。

– 除咗大魚，微縮世界一樣係好吸引。

– 在亞媽灣對開水域就有不同的珊瑚區。

蘊藏物種多樣化︰南丫島

如果話南丫島係一個適合周末去Hea遊嘅地方，你只係答啱咗一半，因為呢個係島嘅「表面」，其實島的「下面」一樣可以Hea住「游」，因為繽紛嘅海洋世界令人大開眼界，啲珊瑚品種又多，物種又多，再加上南丫島呢個位置已經好鄰近外海，分分鐘係會遇見意想不到嘅物種，包括2018年夏天就有島民拍攝的影片流出，話見過有條鯨鯊出沒。其實報導亦引述南丫島嘅漁夫話，七十年代曾見過唔少大魚出沒於南丫島附近嘅……無論你信唔信，都實證咗呢個地方係好有魅力，先至可以成為我哋嘅推介。

– 南丫島之海底都有好多珊瑚品種。

– 這是一種沒有蟲黃藻共生的非造礁珊瑚 (Sun Coral)。

– 好多人都唔知，南丫島亦係個物種多樣化嘅潛點。

– 好運的話係咪真係有機會見到大魚呢？(攝於外地)

– 據知海龜與鯨鯊都曾經光臨過香港海域。(攝於外地)

外海資源最豐富：果洲群島

最後一處要推介嘅果洲群島，係小編好鍾意嘅潛水勝地，名叫群島，原因係用南北兩島做主體，潛點嚟講就分佈兩島不同位置。例如北果洲嘅東岸水深大約十米左右開始，而某啲面向外海嘅位置，例如西北角，深度可以有十五至十六米，對於有經驗嘅潛水員嚟講，係睇軟珊瑚一個極佳之地。至於南果洲的內灣-海膽灣則是珊瑚區，同樣係好多魚類出沒，包括獅子魚、蠍子魚等，另外當然係有齊小丑魚、葵蝦等嘅住客。而最叫人著迷嘅，係南果洲海底仲有一部沉於水底嘅廢車，大概在八米的水深，據知應該係當年走私時慘遭棄置嘅……係咪越講越想去睇吓呢？