【香港潛水有冇最適合時節？Q＆A】

通常在大家打算去外國潛水時，都會第一時間諗呢個問題，究竟咩時間去最啱？夏天？秋天？定係seasonal嘅呢？有冇啲魚，係會在特定時間先見到呢？
對比於香港潛水，我哋可能亦有同樣嘅疑問。今日就等資深潛水員Diver K同大家解答呢個問題啦！！
文：DK （Diver K嘅簡稱，最鍾意去潛水，工作時潛水，休息時也潛水）
鳴謝︰Raymond Man

Q：夏季係黃金檔期？
A：不如講返香港潛水啦！其實香港有冇咩潛水季節？一定有，亦可以肯定講，夏天係香港潛水高峰期，由六月至九月（以前可能係七、八月），每逢夏季，香港受到西南風所影響，而水流也是由珠三角而來，水質未必如冬季的清徹，但係水溫係維持在 26 到 30 度左右，所以穿 3mm 或 2mm 落水都係非常之舒服，而且好多潛點嘅水深只係10米以內，深水嘅潛點都係 20米內，令到潛水呢件事好溫暖……所以，夏季可以話係香港潛水嘅黃金時期！

但大家要留意，水溫同地面溫度對於一位潛水員嚟講，感受非常之唔到，因為水的傳熱度係快過空氣25-30倍㗎﹗

Q：中秋係全年最正？
A：好啦，其實水流與海域，的確係香港潛水員要留意嘅因素，所以話，揀啱位置係首選，但時機其實都好重要。香港夏季的確係最啱潛水嘅季節，不過水一般唔會話係最清，反之江湖傳聞，每年的中秋都係全年最清水嘅時候，究竟係咪堅先？有資深嘅潛水員話我知：「中秋水清係無好正統嘅解釋，只係普遍每年會見到既現象！因為夏天珠江係南水，由南而上，冬季係北上嘅海水，水凍，因此有特別多嘢睇，可能係月球引力令水最清嘅關係，水凍自然會有好多有趣嘅生物出現。」…….信不信由你，但今年中秋我就一定會落水嘅！

每年的中秋都係全年最清水!

Q：冬季好凍係咪可以潛？
A： OK！春夏秋冬四季，對於香港人嚟講，可能有啲難區分，但老實講春天同秋天分別唔係太大，因為水較冷，一般人如果唔係因為學潛水，都唔肯在呢個時間落水。然後你問啲潛水教練，佢哋都唔係好想，但其實佢哋深刻明白到，香港的冬天，水質最好，因為水是來自東北方，亦是外洋深海，所以水質絕對比夏季好得多。而所謂的「大藍水」一般出現於四、五月，但問題係，呢個時期潛水，一定會好凍（OK！雖然香港嘅冬天已經係越來越暖），但水溫一般只有18 – 21度，所以厚重嘅semidry或者 7mm 的wetsuit一定走唔甩！

特別鳴謝：Raymond Man 提供文章相片